Fast eine Woche ist es her, dass wir uns mal wieder über 3 Punkte freuen durften. Aber nicht nur deswegen war viel los „uff´m Berch“. Wir haben einen neuen GF Sport und die JHV wirft auch schon ihren Schatten voraus. Grund genug mal wieder vor und hinter die Kulissen unserer geliebten Westernstadt „K-Town“ zu blicken. Da eigentlich Karneval ist, versuche ich mich mal in „Mundart“ 
Mol gugge wie´s basst…
Dääl dreihunnertfuchzich, odder so ähnlich: Die Knallkäpp vunn de Weschdern-Palz,
also Weschdpalz 
Aweil geht´s los…
Mer schreiwe des Johr zwäädausendähnezwonzisch, mer känne es all net glaawe, awwer es hot mol widder gschneit. So rischdisch runner, weisses Zeich is do vum Himmel gfall. Do war de wilde Weschde gar net wild, awwer poredief rein, odder wie ma do dezu saacht.
Gugge mer mol was die Woch alles los war. Am Samschdaach war Halli Galli unn bissel Zores. Do war imm anner Saloon, also besser in die Barack vunn de “Manhome-Gringos“ unser Pokerschbiel. Kinners, ware des Ziech.
Full House, vorne, hinne, links, rechds. Des hott mer gar net glaawe kenne, was do los war. Unsre Cowboys hewwe bruddal Dampf gmacht. Net widderzuerkenne. Do ging die Lutzi awwer ab. „Ruggi-Zuggi“ hot´s geklingelt und de klää Marius, de Jungschbund, der wo kää Soje hot, der hot noch änner druffgeknallt. Zack, midde uff de Pokerdisch. Die Monnemer-Hufabtreter konnte gar net so schnell gugge wie mer gschbielt unn gschosse hewwe.
Des war jo en ääns A Inschdand vumm Belchier, nix mit Hoor raufe in der bleed Corona Zeit.
Apropos Corona, ich mään jetzt net des Bierzeich um, sonnern des dabbische Virus do. E bissel bleed war´s jo schunn, dass do paar Farmer, Baure un a de „Scheene-Jean“ es net so gonz ernschd gemäähnt hewwe mit dem Zeich. Bissel wennich Obstand war do schunn. Unn monche Hutsimbel hewwe a kää Mask iwwer ihrer Gosch ghabt. Joo, hoffer mer all, dass des gut gange is.
Simmer mol gschbannt wie moje des Schbiel ausgeht. Uff dem Grummbeeracker is jo immer so e Sach… De Saloon is halt a nimme gonz frisch. Monch änner saacht jo zum Rasefrisör a, das der zu bleed is, fer aus´m Bus zu winke. Was a immer des hääße soll.
Awwer des is noch net alles fer heit. De Sondhofer soi KKZ hot zwar die Woch nix gschriwwe, awwer de „FettEx-Werner“, de alt Schdadionflüschderer, kam mit „Njuws“, odder wie des hääßt um die Eck.
Unser Bekannter, de „Henging Thommy“, is jetzt so was wie de zwätt Scherriff vum Saloon. De Big Boss iwwer all die Leit, die do schbiele.
Frieher hot der mol selbscht mitgschbielt unn jetzt ist des kää Biewl meh. Jetzt isser de Boss. Isch glaab der hot sogar zwää Bischdole am Gertl. Do wird de „Mick Blädsch“ awwer bleed gugge. Denk awwer, dass er immer noch de beschd Schitz im gonze Wilde Weschde is. Der schlaat zwää Migge mit änner Bischdoolekuchel.
Im Sherrif-Office sinn a bald widder Wahle fer die Uffbasser vunn „K-Town“. De Zohschdäbohrer vunn Lautre will widder ohtrete. Alla hopp, wenn er määnt. Awwer do musser demit rechne, dass mer all beim Zohdoggder schunn mol nohbohre. Mer denke jo all, dass die Worzel allen Iwwels noch net gonz gezoche is. Trotzt dem Zohdoggder. De „Wyoming-Weimer“ will a widder debei sinn, unn de „Kesselfleisch-Kessler“ zwäämol...
Wenn se määne. Gonz krass is jo de Fudde, besser bekonnt als de „Grumbeer-Fritz“. Do hot der jo ledschd Woch mim Belchier änner nausgehaue. Wohnsinn!
Iwwerascht hot mich a die Kandi.. kondidaduh--- heer mol wie hääßt des jetzt…
Also de „Flinte-Remy“ oder „Remington-Remy“, will jetzt a mit uffbasse, sozusaache will er de Babbe vunn all werre.
Ich glaab im Momment sinn acht kandidu… Candyd… Gewidder, Dunnerkeidel, rutsch mer doch de Buggel nunner!
Nochemol, Acht Leit wolle halt debei sinn, so, jetzt isch´s raus!
Des Gonze wird so neimodisch gwählt, hopp, ich wääs net ob des glabbt, awwer gut, mer honn schunn all viel erlebt uff´m Berch, des wird schunn gehe. Mer derfe halt all net in de Saloon. Mer misse dehääm hogge, unn vunn dort wähle...
Die glaawe jo, mer kumme all uff de Worschdsupp dohergepaddelt! Mer kriesche des doch all gebagge, odder?! Mer sinn net zu dabbisch, fer e Loch in de Schnee zu brunse. Des basst schunn!
Wart jetzt mol zuerscht uff de FettEx-Werner, der soll mim Kennwort kumme. Awwer ich heb doch gar net de „Kentucky-Kenn" beschdellt?! Kinners, die mache mich gonz heckewelsch!
Ich glaab ich reid emol widder mit moim Gaul raus in die Prärie. Heb kää Luschd in moiner Weschdern-Bud mim Butzlumbe sauwer zu mache. Reid liewer unn esss mol moi Weschdern-Saumaache mit Quetschekuche. Hallo Dinnschiss!
Sattel jetzt erschd mol moi Gaul, de alt „Peederle-Pinolino“.
Vielleicht treff ich jo de Exil-Deiwel uff soim „Arabber-Alfons“. Donn reide mer zamme unn suche die „Lasso-Lea“. Heb awwer so´n Verdacht. Die werd wohl eher mim FUX donse. Denn der hot Awweitsschuh, ich heb nur so billische Stiwwel vunn Roschy.
Also widder nix mit bussiere.
Werd mol widder weiderreide. Ihr kennt jo an de Brutzelstubb babble. Es gebbt jo genuch zu dischbediere in „K-Town“. Awwer losst eich net drietze. Muss mer a mol realistisch sinn…
Alla!
Unn weider geht’s…
. Denn der hat sich wenigstens an die Corona Regeln gehalten.
).
STOP WAR! FUCK PUTIN! 
