Weihnachtsgedicht 2025
Uffem Fritz soim Bersch bleibt alles beim Alte
Wann de Winder am kalschde werd,
un de Pälzer soin Gliehwoi zerrt,
donn is Zeit for's Resimmee an Hand,
s'werd Woihnacht im Pälzer Land.
Un wie in alle denni Johr,
seit 2006, is werklich wohr,
versprech ich eich, das ist mein Ziel,
es werd ganz korz, es war jo net viel! :-D
Tatsächlich will ich misch jedesmol kerzer halle,
ich steiger mich dann awwer von Fall zu Falle,
was kann ich donn defor, ajo, ihr Ikone,
de Betze sorscht ständisch for Emotione.
Doch simmer mol ehrlich, känn Geschiss,
es änndert sich nix, alles bleiwt wies's is,
die Liga wechselt alsmol, mir kriehn ään, zwää Falte,
doch uffem Fritz soim Bersch is alles beim Alte.
Die Rickrund, ajo, die war passabel, wie ich finne,
denn jedem Ende wohnt ein Anfang inne,
Im Pokal war mer raus, un ... errinert eich korz,
grad vor Weihnachte 24, gabs aach kää Proporz,
in Darmstadt die Fäng krieht, gege de Eff Zeh dehääm verlore,
und Weihnachte war am Arsch, na, klingelts do in de Ohre?
Deja vu, saat der Franzos, vorm Winder, dem Kalte,
un uffem Fritz soim Bersch is alles beim Alte!
Dann vier Siege in Folge, un ihr ahnt es schon,
jeder schwätzt glei vum Uffstiech ... ohne Relegation,
bis Ende Februar, ihr wisst's noch genau,
donn Desaster Grandioso auswärts beim Ha Ess Vau.
Mir ware owwe nah dran, doch nie werklich do,
noh'm Nürnbersch Spiel wars erum, das is net geloh,
an Oschdre in Braunschweisch die Büchse dann knallte,
un uffem Fritz soim Bersch war alles beim Alte.
Es hat immer nur e Bisselsche für de Durchbruch gefehlt,
doch zufridde war mer net, ne, ne, weit gefehlt,
wie stets in de Johre seit em Uffstiech von unne,
wurd im Trainer der Grund für das Versage gefunne,
erscht word nur gehetzt, donn wurd geschribbe,
am Schluss war mer sich sicher, wie immer in der Sippe,
uff de Tribiehn, uffem Kiebitz, un do, wo se schalte und walte,
ajo, uffem Fritz soim Bersch, do is alles beim Alte!
Mir kennte jo uffsteihe, mir sinn bloß zu bequäm,
un nadierlich is der Trainer unser greeschdes Probläm.
Also werd er öffentlich wirksam erscht angezählt,
un donn halb offiziell in laut Frage gestellt,
die Monnschaft weeß nimmer, wo's vorne, wo hinne,
die Rheinpfalz schreibt täglich iwwer Volkes Stimme,
ob mer gut spiele, orrer net, is egal, mir dun spalte,
Kinners, uffem Fritz soim Bersch bleibt alles beim Alte!
Vielleicht war's jo onnersch, un bevor jeder schennt,
wer weeß schunn, wer's Kind beim Name do nennt,
es gebbt halt paar Leit, die im Trübe oft fische,
sich awwer ins sportliche Tagwerk dun gern mol inmische.
Un wammer zisch Direkdore hett, für Inveschdore un Kunne,
awwer nur änner Chef, un der gebbt de Druck donn noh unne,
donn konn känner sei Määnung for sich wohl behalde,
un for de Trainer bleibt uffem Bersch donn ewe alles beim Alte!
De Trainer gewechselt is schnell, ihr Kanone,
doch was hatt's uns gebrung, es ist es Ausred für's Schone!
In Kölle war hibbodedisch die Relegation jo noch drin,
doch wie mer do uffegestellt ware, ich dacht ich spinn!
Unnerwürfisch, ängschtlich, ohne Bravour,
klar Elversbersch hett gewunn, do brauchsch du kää Schnur,
doch wenn um was geht, dun mir nur noch verwalte,
am Schluss bleibt uffem Bersch doch alles beim Alde.
Cut! Ende! Aus die Maus. Die Mess is geles!
Ab heut kummt Butter bei die Fisch und Haschee uff die Klees!
Jetzt hommer e Trainer der alle begeischdert,
die do Seisong werd annersch, wird geiler gemeischdert.
Zwische Platz Änns und Platz drei, alles onnri is Frevel,
der Lieberknecht zieht weile am rischdische Hewel,
Juppheidi, ei ihr Deiwel, wie ich misch do frei,
uffem Fritz soim Bersch werd hortisch alles nei!
Was hemmer gehol, nur Granate, kää Stick Vieh,
der Aschda, der Tschamfi, der Schahinn, der Ämräli,
der Priddahin, der Sküddä, un der Kim, un der Kunze
donn noch de Schohli, jetzt kenne mer brunze!
Die eischeni Bu noch debei, Dunnerg'witter,
un außedemm hemmer jo aah noch de Ritter,
MR7, Genie, Fußballgott, Kapitän!
Uffem Fritz seim Bersch wird jetzt alles schään!
Spielplan kimmt raus, Hannover zuerscht,
do krieht der Tomiak erschd emol änni geberscht!
Un der Yokota der Bassel, dem wird glei gewiss,
wo uff de Dannstadter Heh de Gutselstand is!
Im Pokal noh Berlin, alla fascht, newedran,
ei die do Seisong fängt emol herrlisch wohl aan,
Rambazamba, Ufftata, Bimmelim und Juchei,
dissjohr wird uffem Fritz seim Bersch alles nei!
Ajo, gut, verlore, kimmt vor uff de Stroß,
awwer jetzt noh Hannover geht's rischdisch los!
Sieg gegen Schalke, das is doch normal,
die honn jo nix druff, un die spiele banal,
ok, ok, in Elversbersch halle mer känn Schritt,
awwer das is net schlimm, weil die liehe uns nit,
Gege Darmstadt awwa, olé, das war Kräm della kräm,
ach, uffem Fritz seim Bersch werd doch alles schään.
Fürth noch gebutzt, doch schunn do wird verschwiege,
dass gege zehn Mann mir grad die Kurve kriege,
Münschder war Pflicht, doch aach die ware dran,
das Ergebnis lügt uns da dreist und frech an.
In Paderborn gabs dann Klarheit uffem Deiwel seim Kutter,
do gabs sportlich und spielerisch Backefutter.
Verdammt noch emol, hört das Rufen im Walde,
sonscht bleibt uffem Bersch doch widder alles beim alte!
Ei jo, ... mir hunn Verletze, wie immer fatal,
ei jo, ... alsemol wackelt aach hinne de Krahl,
ei jo, ... der Trainer dut taktisch nix umstelle, aach wenn er misst,
ach kummt Leit, das is de Torsten, macht jetzt känn Geschiss!
Der passt zu uns wie em Fritz sei Fauscht uffem Deiwel sei Auche,
Denni werd de Don Hengen nie z'samme stauche,
Heert mer uff mit der ewische Liddanei,
weil uffem Fritz seim Bersch wird alles nei!
Bochum g'schlage, überzeugend und verdient,
Jetzt simmer do, ich sag's unverblümt,
Auf zum Derby im Wildpark, bei die Gelbfießler, mit Gebrüll,
mir reiße die Bud ab, mir hallen net still,
hin un her wogt das Spiel, beide kennen gewinne,
beide offensiv vorne hui, un scheiße ganz hinne,
Donn kummt MR7 und schießt den Wildpark entzwei,
jaaaaahaaaa, uffem Fritz seim Bersch is alles nei!!!
Kleiner Dämpfer gege Nürnbersch, egal weiter, weiter,
das hätt 17:0 ausgehe misse, das wär gescheiter!
Das gleiche nochemol in Disseldorf bei de Hose ....
Wege dem bleedi Schiri, dem bleede, was für e Schose!
Der VAR is känn Thema in meinem Gedicht,
weil do kriehn isch sunscht Plack, e Blutstorz un Gicht!
Is ach egal, die hallen uns net uff allewei,
weil uff em Fritz seim Bersch is alles jetzt nei!
Im Pokal geht's jo weiter, do zieh'mer uns hoch,
Nach Fürth widder Berlin, klarer Sieg kää Froch!
Jaja, mer merkt langsam dass der Kader net reicht für jed Woch,
awwer das is e geili Truppe und es funktioniert ewe doch!
Und der Trainer is werklich, ich darf doch wohl bitte,
in jeglicher Hinsicht absolut unumstritte!
Weil wenn net, das wär schlimm, wenn die Büchse da knallte,
ei donn wär jo doch widder uffem Bersch alles beim Alte?
Zwää Heimspiele jetzt, do ziehe mer dorsch!
Zack, gege die Hertha gabs donn glei uff die Gosch!
Und das war verdient, die waren klar besser,
do brauch mer net greine bis uffs Blut un uffs Messer.
Das war schunn die Aansaach für de Pokal,
doch vorher kam Kiel und das war infernal!
Vum Betze geballert hemmer die ohne Häm'
Ach jo, uffem Fritz seim Bersch do isses schäääääään!
Mit breiter Bruscht auf nach Braunschweich, do is was offe!
Doch ihr liewe Leit, was hemmer do nur verbroche?
Das war unterirdisch, peinlich, ein Tal der Scham,
un känner weeß hinnerher, wie das so kam!
Alle versagt, uffem Platz un uff de Bank,
kann jo bassiere, do brauchs noch känn Zank.
Das werft uns net um, oder? Das bissje Bohei!
Weil in Berlin gibt's e Reaktion un donn werd alles nei!
Vier Daach nur bis zum Spiel im Olympiastadion,
do kennt mer jo grad im Norde bleiwe zur Fron,
trainiere im Harz un sich gegeseidisch pusche,
sich heiß mache für die Karlsruhefreunde, die Lusche!
Doch man flog heim nach der Schmach, und dann wieder hin,
am Spieltag erst selbst, was ich sehr seltsam finn,
Biorhytmus am Arsch, das weiß jeder im Walde,
is doch net wohr, Mensch, widder alles beim Alte!
Für mich, ohne Witz, deshalb aus meinem Munde,
war das der größte Fehler der halben Runde.
Das war überheblich, wenn aach net so gewollt,
und deshalb hat euch die alte Dame den Hintern versohlt!
Un das is dann der Punkt, wo auch ein Trainer mit Pfiff,
den Haufen der Deiwel verliert aus dem Griff.
Und weil das ewe nix Neies is, im Winder, dem kalte,
ist irgendwo doch uffem Bersch all ... ok, vieles beim Alte.
Lufthole, nohm Dresden-Spiel, Erleichterung pur.
Wär das in die Bux gang, gäbs den Lauf der Natur.
Trotzdem is wohl jedem rodi Deiwel klar,
dass Dynamo einfach kein Gegner war!
In Bielefeld hinne donn dicht, aber vorne blamabel,
do hilft känn Gebet und aach kää Parabel,
uns fehle vorne die Leit, wie em Deiwel die Glut.
Sonscht wär uffem Fritz seim Bersch vielleicht alles gut.
Nur jetzt bitte g'winne, gege Machdebursch,
leider sinn die grad nohm Trainerwechsel gut in de Furch,
mir hatten jo aach Pech, ihr schofelische Nase,
hatten de Club, Hertha, Paderborn und jetzt die in ihrer besten Phase.
Un dann so ein Kick ... wisst er, do kennt ich heule!
Alles onnri is Kokolores, do kriehn ich die Fäule.
Torsten, sei mer net bees, das war kää Flääsch und känn Fisch,
nix is beim Alte, awwer der do geht uff disch!
Un ich will nur dass mer ehrlich mitnanner redde,
du bisch unser Trainer, uff disch däät ich wette,
du bisch änner vun uns, das is net bloß en Spruch,
awwer helft er dir werklich, der Stallgeruch?
Net alles konnscht du mir mit denni Ausfäll erkläre,
net alles mit Fitness, do muss ich misch wehre.
Du muscht ääfach zugebbe, do geht känn Weech dro vorbei,
uffem Fritz seim Bersch is net alles nei!
Bass uff, mir laafen ze wenisch, mir sinn ze weit fort,
mir hallen känn Ball, känner is on seim Ort,
mir schießen vorne zisch mol vorbei volles Rohr,
unn in de Mitt simmer offe wie e Scheindoor.
De zwäddi Anzuch basst net, das wär awwer zu leicht,
weshalb mir die Antwort do druff aach net reicht!
Die Buwe wolle all, do gebbts känn Geschiss,
weil das uffem Fritz seim Bersch schunn immer so is!
Das sinn alles Leit die wo letscht Johr, zum gleiche Moment,
nur änner Punkt schlechter ware, wie das was jetzt do rennt!
Un wammer uff de Hansi setze und uff de Redondo hoffe,
dann is des zwar Herzblut, awwer es macht misch betroffe!
Es konn un derf halt net sinn, dass mer bei alle denni Ressource,
und mit all denni schenni neie Buwe und Bursche,
so hinne die Flämm kriehn, do kriehn ich de Graus,
do siehn uffem Bersch selbscht die Neie alt aus!
Trainer, warum, wieso jetzt der un net der?
Trainer, wieso känn Viererkett jetzt, bittesehr?
Torsten, mol ehrlich, wieso rechts kää änner Balle,
mein lieber Knecht, wieso zentral immer die gleiche Falle?
Wieso alles iwwer links, wieso kummt der Ritter net glei,
warum spielt der Sahin immer mit de Handbrems allewei,
weshalb konn der Kunze denni Balle net halte ...
ach scheiße is doch widder alles beim Alte?
Was is los mit dem Sirch, der spielt wie mei Mutter!
Is mit dem Gyamfi do hinne noch alles in Butter?
Der Haas is iwwerspielt, der Robinson ditto,
Wieso kickt der Krahl net mehr mit, mir halle känn Schritt do!
Wieso hemmer känn Ballbesitz, hole kää zwäddi Bäll,
wieso mache mer net cool vorm Door, sondern hektisch un schnell,
Warum falle mehr hinne ausenanner wie e roh' Ei?
Ei, ich dacht, uffem Fritz seim Bersch wär alles nei!
Marlon, mein Held, was solle die Posse,
ok, gege Paderborn hett er disch net gelosse,
gege Karlsruh warscht de Hero, ab und zu duscht mol glänze,
awwer aach oft mol e ganzi Halbzeit donn schwänze.
Un Tormann, ey, weescht, isch konn disch gut leide,
awwer es wird Zeit das du lernscht en Ogriff inzeleite!
Die Bäll kommen all retour, un donn konnscht nimmieh schalte,
donn is am Ende uffem Bersch widder alles ... fascht beim Alte!
Puh ... mol atme ... mol de Herrnkaschde spüle!
Mol korz iwwerlege, was waren die Ziele?
Also die vun eich, vun mir, vun de Kurv, vun de Tribiehn ...
En guder Platz owwe, kumme mer do hien?
Vielleicht geht's aach ganz hoch, do bleiwe mer munner,
awwer ganz sicher geht's mit denni Buwe net ganz enunner!
Doch sicher is aach, do brauchs känn Geschrei,
uffem Fritz seim Bersch is ewe net alles nei!
Unser Invedorsche gewwen Geld, awwer das reicht nur for's Porto,
un noh de Paus sind vielleicht die Beschde widder fort do,
donn wird widder hektisch geguckt, wo mer noch änner finne,
änner for vorne, for Auße, for die Mitt un for hinne ...
Uff gut deitsch, for iwwerall, un das konns jo net sinn,
wemmer schunn soviel geholt henn, das weeß jedes Kinn,
un das lieht net am Trainer, der bads aus nor, gewiss,
dass uffem Fritz seim Bersch net alles Alte nei is!
Drum bleibt geschmeidisch und geduldisch, wo kummer sunsch hiene,
stoppt denni "Mitdenker" im Hinnegrund liewer die Kieme,
losst die denke, die uffem Platz stehn und net uffem Abort,
net die in de Loge, sondern die mit Ahnung vum Sport.
Donn werre mer siehn, ob der Torsten, ganz echt,
änner vun uns is und aach bleiwt, mein lieber Knecht,
reißt jo nix in, was der grad uffbaut, ihr Krawallte,
donn wär nämmlisch uffem Bersch werklich alles beim Alte.
Das Ganzi drumerum, von de JHV, von de Kurvepolitik,
von de Auswärtskarte, vum Fanshop, do hall isch mich dissjohr zerick.
Vieles is do beim Alte, werd nur nei gemolt,
Awwer es gibbt wischdischere Sache, werd mer aach manchmol verkohlt.
Ich wünsch mer mei Rose-Schorle zerick, un mehr rodi Klamotte,
net so viel schwarz-orange un türkis, ihr krumpelische Sorde,
Weil, alles beim Alte ist vielleicht doof und schade
awwer em Fritz sein Bersch is nunmol weiß und rot, ihr Granate!
Ich wünsch mehr, dass ich vorm Spiel in de Nordtribiehn saufe,
un donn erscht iwwer die Wescht in die Süd riwwer laufe,
ich wünsch mer vorm Spiel am Kreisel, im Tunell,
das die Polizei mehr begreift und die Stadt handelt schnell,
ich wünsch mehr Busse for die Gäscht un mehr Parkplätz im Oschde,
wemmer 50.000 Zuschauer hott, dann derfs aach was koschde,
Losst uns z'samme die teuflische Zukunft gestalte,
em Fritz sein Bersch ist Kult, bei de Neie un de Alte!
Also, Schluss mit Gejohmer, bassiert is bassiert,
kein Blick zurück, nix laaft ewe wie g'schmiert,
mir trinken jetzt Schorle, stecken was zwische die Kieme,
un ab em 18. Jänner schmeiße mer Fett uff de Rieme!
Julian, Simon, Jan, Mika, Max und Jisoo,
Florian, Luca, Afeez, macht uns froh!
Fabian, Tobi, Leon, auf sie mit Geschrei!
Macht uffem Fritz seim Bersch widder alles nei!
Semih und Nataan, Dickson und Farid',
Mahir, Daniel, Ivan, Richie, auf geht's, macht mit!
Dion, Erik und Owen, gebt Gas, sucht das Glück,
Kenny Prince, altes Haus, komm wieder zurück!
Und ... Maaaarlon! Ess net so viel, sonscht bische platt!
Dann schießt ihr den Bobo am 18. raus aus der Stadt!!!
Ach, und Thomas, ... lass dem Torsten sei Peif, ewei,
vielleicht werd jo uffem Fritz seim Bersch noch was nei ...
Ihr liewe Deiwel, kommt gut iwwer die Runde,
verbreitet in der fröhlichen Zeit weiterhin frohe Kunde,
denkt dro, wo mer her kummen, und wie lang war die Schande,
trotzdem simmer immer noch die Nummer Eins hier im Lande!
Drum seid demüdisch und glücklich, und grummelt nur leise,
habt Geduld, bleiwt gelasse, wie der Fritz einst, ... und weise.
Uffem Fritz seim Bersch un iwwerall im Lautrer Land, dem kalte,
frohe Weihnachte, ihr Deiwel, denn nix bleibt beim Alte!
Rossobianco und das gesamte Team von Der Betze brennt wünschen Euch frohe Weihnachten und einen guten Rutsch ins neue Jahr! An den Feiertagen lassen wir es ein bisschen ruhiger angehen. Trotzdem informieren wir Euch natürlich auch zwischen den Jahren über etwaige Neuigkeiten von den Roten Teufeln, zum Beispiel im Transfer-Ticker.
Zur Forumsdiskussion:
17 Kommentare
