Frohe Woihnachte, ihr Leit!

Fröhliche Weihnachten, Merry Christmas, Joyeux Noël, Buon Natale, Feliz Navidad, 聖誕快樂 新年快樂. Oder ganz einfach uff pälzisch: Frohe Woihnachte, ihr Leit! Wir wünschen Euch schöne Feiertage mit unserem längst zur DBB-Tradition gewordenen Ritual – dem Weihnachtsgedicht von Rossbianco.

Wann de Winner am kalschde werrd,
un de Pälzer soin Gliehwoi zerrt,
donn is Zeit fore Resimee anhand,
s’werrd Woinacht im Pälzer Land.

Ich wääß, ihr denkt jetzt es kummen beizeide,
jetzt siwwenfuzzischhunnert Seide,
mit Fluch und Tadel und Gejohmer,
iwwer die Hosebloser un die Strohmer,
die sich uff unserm schänni Bersch,
benemme wie e schwanger Lersch,
un unseri geliewte Betze,
von ääner in die anneri Scheiße hetze.

Doch wissen der was, der Hahn, der kräht,
noch jede Moje, und grad ze lääd:
De Deiwel steht aach uffem Hauwe,
von lauder Mischt ganz owwedruff,
scherrt mit de Hufe in de Trauwe,
und macht so Schampus for de Puff,
Egal wer uns an Bään gepisst,
ob Räte, Vorständ orrer Trainer,
wer draan schuld is, druff geschiss,
weil unsern Deiwel nemmt uns kääner!

Un wann die Schnorrer irschendwonn,
bei ihre Banke und Berater,
ihr Kohle zähle, mit großer Wonn,
weil mir sinn läärisch das Teather,
donn sieht ihr wo die Schurke hocken,
un wer de Moscht zum Barthel trääht,
donn sinn die Hundsferz, wo’s verzocken,
iwwer alle Bersch, un kääner frääht,
was sellemols mol is gewes,
wo die „Krawallbrierer“, ganz parat,
denni Zocker die Levite henn geles,
un die Wohrhäät henn gesaat!

Nää, unseri Deiwel, der bleibt stehe,
uffem Mischt ganz owwedruff,
und guckt bei Sunnschoi un bei Räje,
ennuner in den Schampus-Puff.
Und denkt bei sich, wissend der was,
E Borrem, den hett jedes Fass,
un wenn er unne aankumm seid,
donn wissen der, es is soweit:

Donn helft kää Bede un kää Schelle,
kää schlechte Informante-Quelle,
kää Wirtschaftsprüfer, kää Rechtanwält,
kää Kommission, kää großes Zelt.

Kää großer Redner ohne Ahnung,
kää Info-Post, kää driddi Mahnung,
kää Gewelljers un Gezeter,
kää Lüüsche iwwer de Brieschel Peter,
kää Mourhino, kää van Gaals ihr Louis,
kää Tapetewechsel un kää Feng Shui!

Donn helft nur noch de liewe Gott,
weil der noch Reschpekt vorm Deiwel hott,
und weil der äänzisch un allään,
sich net beruft, mit dicke Trään,
uff das wo jerer sich druff sterzt,
der määnt er hätt e Herzblut-Herz!
Un greint mit Sabber und mit Blitz,
vun Ehr‘ un Stolz vum aldi Fritz!

Un sich net schämt, sich zu bequäme,
denni Name in de Mund ze nähme,
un von dene Werte ze redde un vun Ehr,
weil die gebbts uffem Bersch net mehr!
Un das is, was uns macht kaputt!
Kää Ultra, kää Normalo und kää Kutt!
Uns macht kaputt, dass jeder määnt,
er wär mi’m Fritz intim gewäänt,
un sich anmasst allenhalbe,
mit dem Fritz seine Werte den Veroi zu spalte!

Ich saans ganz laut, un net verzagt,
ich will hier net redde iwwer die Plag,
dass mer de Uffstiech immer verbasse,
dass mer die Fananleihe verprasse,
dass mer die Trainer immer entlosse,
dass mer vor de DFL hewe die Flosse!

Dass mer die Stadt un‘s Land beliehe,
dass mer nirschendswo mehr Kohle kriehe,
dass kää VIPs un Sponsore finne,
dass mer die Bilanze lese vun hinne,
dass mer net wisse was näggschd Johr kummt,
dass mer net Katz sinn und net Hund,
sondern Maus, ganz groo, un met’me korze Schwanz,
un dass kääner bittet uns zum Tanz!

Nää, do driwwer will ich net redde!
Weil isch sunscht viel mieh zum schelle hätte!
Un so konn isch misch lehne zerick,
un schreiwe eich nur e klännes Stick,
es Geschichtelche vum Betze,
weil kääner will an Woihnacht hetze!

S’is alles gut, s’is alles recht,
Ihr seid die Vorständ, mir die Knecht!
Mir sinn liquid, un aa solvent,
wer‘s halt net glääbt, der hott gepennt,
und steht, wo’s aus der Büchse schallt,
mitten im dunklen Grünewalt .... Äääh .... grünen Wald!
Schuldischung...

Mir honn halt Pech mit dene junge Spiller,
und mit de Trainer alle weil,
wer konnt schun ahne, dass so Killer,
und so Burner net innschlaache, zum Teil!

Des muss am Kopp lieche, vun de Bu,
do gucken mir net länger zu,
damit die net sinn so betreppelt,
werrd die Kabine ingenewwelt,

Die Mannschaft stellt uff, wie ich ahne,
ab sofort nur der Schamane,
und schieße mir donn mol e Door,
des kummt jo net so heiwisch vor,
donn schreien mir net laut eromm,
sondern summen leise: „Ommm“!

Donn noch bei aller Seelegeduld,
die Schiri, ...ei die sinn immer schuld,
mir werrn betroh, von links bis rechts,
von hinn noh vorn, mir werrd ball schlecht,
wenn all die bleedi Schiedsrichter-Deppe,
in ihrer Kabin aa mol des Feng-Shui hätte,
donn dääde mir feire Sieg um Sieg,
un wärn schun in de Tschämpiens-Lieg!

Drum redde mer gar net iwwer dene Krempel,
mit wollen do jo kää Exempel!
Un net, dass ääner denke dut,
uffem Betze, wär net alles gut!

Die Ratte verzähle jo all nur Stuss,
de Betze is sicher, un immer im Plus!
Un wann‘s mol net mieh reicht, donn machen mer‘s wie immer,
donn verkääfen mer halt de Müller un de Zimmer!

Also iwwer was redde mir eischentlisch donn do?
Wenn jo alles besser is wie annerschwo?
Ei jo, jo alla... jetzt fallt mers wirrer oi,
iwwer de weltallerbeschdi Fußballveroi!
Un iwwer die Werte, es is jo kää Witz,
vun unserm Beschde... em Walter Fritz!

Weil jo jerer, der sich do druff beruft, ohne Geschiss
audomatisch Herzblut hott un e Guder is!
Deshalb derf sich nix ännere, aa wann sich‘s ännere duut!
Des derf ääfach net sinn, do verziehe mir kää Schnut!

Un wann mer druff angesproche werrn,
uff unsern Veroi, donn hommer frieher jo gern,
mit stolzgeschwellter Deiwels-Bruscht,
was zum Verzähle henn gewuscht...

Donn saa’mer heit ewe „Dunner un Gewidder,
mol de Deiwel net an die Wand, des werrd schun widder!“
Bloß nix zugewe, bloß net zaudre,
mir sinn jo die Deiwel, und kummen vun Lautre!
Un wann uns ääner kritisiere will,
donn machen mir den schnell ganz still...
mir redde nur ääfach, des is kää Witz,
von Ehr‘ un Stolz un vum alde Fritz!

Un deshalb steht der Deiwel owwe,
uffem Mischhauwe un scherrt,...
und merkt net - völlisch unbetroffe,
dass der Hauwe immer greeßer werrd...
Ihr liewe Leit, ihr kennt alles glääwe,
macht ebbes degeje, orrer lossts halt so lääfe,
Awwer waacht eich nit mieh, eich zu berufe,
uff de Fritz, sunscht spürt ihr des Deiwels Hufe!

Wer brav war, der brauch do driwwer, jede Wette,
jo iwwerhaupts gar net ze redde!
Dem wünsch isch, ganz speziell diss Johr,
im Schritt e digges Deiwelshoor,
damit’s beim Dusche jeder wääß,
un bei de Kinn schun in de Schääß,
un klar is, ään for allemol,
dass uns all de Deweil hol‘
un deshalb steht der, so wie’s is,
immer owwe uffem Mischt!

Machts gut, bis näggscht Mol, losst eich feire,
duut eich net iwwer die ganzi Mischthauwe aire,
bleibt geschmeidisch, atmet durch die Hose,
un duut emol e Feddersche blose!
Bleibt deiwlisch druff un immer heiß,
un glaabt ääfach net jeden Scheiß!
Trinkt eich ääner, macht eich breit,
Frohe Woihnachte, ihr Leit!

Das gesamte Team von Der Betze brennt schließt sich Rossobianco an: Wir wünschen Euch frohe Feiertage und einen guten Rutsch ins neue Betze-Jahr – bleibt gesund! Und schaut ruhig auch zwischen den Jahren mal hier vorbei, denn auch in aller Besinnlichkeit halten wir Euch natürlich über die wichtigsten Neuigkeiten rund um den 1. FC Kaiserslautern auf dem Laufenden.

Quelle: Der Betze brennt | Autor: Rossobianco