S'woihnachtet sehr!

Pünktlich zum Fest erscheint heute unser traditionelles Weihnachtsgedicht. Rossobianco blickt für "Der Betze brennt" auf ein denkwürdiges Jahr 2012 zurück, das für den 1. FC Kaiserslautern und seine Fans leider mehr Tiefen als Höhen zu bieten hatte - pälzisch, lustisch und nicht ohne die eine oder andere kritische Spitze.

Wann de Winder am kalschde werrd, un de Pällzer soin Gliehwoi zerrt,
donn is Zoit fore Resimee an Hand, s’werrd Woihnacht im Pällzer Land.

Was e Johr! Viel zum Verzähle! Was freit uns all, was duut uns quäle?
Wer hott mit wem un iwwerhaupt, was is vebott un was erlaubt?
Im Jänner gab’s schunn e paar Kracher, kummen sollt der Kagelmacher,
doch wollt der net in die Pallz zur Kur, wollt lieber an die Cote d’Azur.

Und weil dem soin Berater schlau, saat der zum Betze: Guckt genau!
Wann ääner net will, macht doch kää Zank, ich honn noch en annri for uff eier Bank!
So hemmer denni aus Bochum gehol, warum wääß kääner, der komische Vohl,

Noch e Pole dezu un aach noch e Däne, un dann noch de „Treffnix“ vun Werder Bräme...
Sinn all nimieh do, die Super-Kicker!!! Die spiele for mieh Geld woannersch Klicker.
Und der aus Bochum sitzt aach net uff de Bank, do is’sem ze kalt, deshalb feiert’er krank.

Aach noch do is de Ariel, ...des hott nix mit de weißi Wäsch ze dun, gell!
Der wollt erscht nit, dann wollt er doch, is statt noh Belgie uff de Betze gekroch.
Is Leistungsträscher wor und geblibb, so schnell springt der’m Deiwel net vun de Schipp.
Is aach nit abgehaut, als die zwätt Liga kam, drum danke Ariel... bische guder Mann!

Fort muschde aach, zum Beispiel de Amedick,
manch ääner säät joh weh’me dumme F... äääh. Missgeschick!
Vielleicht is joh deshalb vor lauder Schreck mitt’eme Knall,
aach der Adam so plötzlich vum Kerschebääm gefall?

Egal, es kummt, wem’s kummt, und s’is wie’s is, un selwscht in de Bundesliga is gewiss,
Elf „Freunde“ schläät’s immer uff de Maa, loscht du die Finger net bei doiner eischeni Fraa!

Nohdemm des Wechselspiel abgeschlosse, wurde mer uffem Platz wirrer abgeschosse.
Geeesche Bräme net gewunn und donn, ich kriehn die Welle,
dehääm ... velore ... geesche ....Kölle!

Als das es letschti Mol passiert wohl is,
honn isch glääb noch naggisch unner de Chrischtbääm geschiss!
E Sünn un e Schann, ich muscht beinägscht plääre,
wie soll isch das bloß moim Bub erkläre???

Donn geesche die Bazis kää Schangs, was will mer do siehn,
isch fahr in denni VIP-Zirkus schunn lang nimmieh hien.
Die Woch druff dehääm Gladbach gabs aach uff die Sohle,
Super Door vum „Oh Jesses“, doch Sieg for die Fohle.

Jetz awwer druff uff de Feind, all noh Määääänz!
In de Hinrund hemmer se geschlaa, die Pänz!
Also nemme mer do aach drei Punkte mit! ….Ach.... Wär’mer nur dehääm geblibb!

Was e Schmach, was e Schann, isch konnt’s fünnef Daach net glääwe,
muss mer so was in moim Alter aach noch erlewe?
Heit bin isch mer sicher, trotz Ach un Weh, ... beim Depp,...do simmer abgestäa!

Was hinnenoh kam, war Krach un Tumult, vorbei wars bei de Meischde mit de Geduld,
rassistische Sprich am Trainingsgelände, die Nerve liehn blank, das sprach doch Bände.
Donn de Ricktritt vum Ricktritt, der doch Ricktritt muscht bleiwe,
vum Seschder Martin, isch konnt den gut leide!

Klar wor is jedem rund um de Betze in dere Zeit,
daß wer zeviel die Wohrheit säät uff de Streck meischt bleibt.
Un damit des aach jeder kapiert, ... dass es rum is, gell,
war’mer noh dem Kick geesche Wolfsburg aach Letschder in de Tabell!

Donn noch vun Schalke uff die Schnuss im Falle, de Trainer fort, war nimieh ze halle.
Statt’me harte Hund kam de krassi Balakov, un rund um de Betze gabs als weirer Zoff,
In Freibursch velor, de Trainerwechsel vepufft,
Chaoslautern is zerick, es helft nor noch de Suff!

Mer sollte nur noch ääns gewinne, weit fort bei de Hertha, die dachte, mir spinne,
doch mir henn uns geschwor, uff denni schweri Ritt,
enunner in die zwätt Liga, do nemme mer eich mit!

Bala war Geschichte, das war jedem klar, nur siwwe Spiele, war for’e Tausendsassa,
Un dofor e Ablöse bezahlt... eine wahre Pracht!
Isch glääb, sogar Krautzuns Eckhard hett '96 mieh Spiele gemacht!

Also nor mit Wut im Bauch un flammende Redde, kammer de FCK vielleicht noch rette.
Deshalb uff die Perd, un nei gesattelt! Un mol heere was der Kuntz weile babbelt!

Am 9. Mai, die grossi Schau, de Betze lädt in zur AOMV,
das is’se Mitglieds-Versammlung, wo die was saan derfe,
die sunscht es Mundwerk ze halle honn und mit Turnbeitel werfe.

So henn isch gedenkt, awwa s’is annersch kumme, die Bosse henn sisch’s Mikro genumme,
unn wann dann doch ääner vun de Mitglieder schennt,
donn kummt de Minischderpräsident gerennt!

Die Zahle geschönt, zwää Millione verboh, un trotzdem dodebei net geloh,
des musche erscht mol schaffe, un alles bleibt wie’s is,
Hauptsach de Balakov enaus geschmiss!

So simmer dann hääm, so schlau wie zevor, das ganzi war’e Ufftritt for’s Kanonerohr!
De Kuntz war de Held, de Rombach macht de Diener,
de Grünewalt hett sich nor verrechent un is gar kää Liehner!

De Uffsichtsrat führt Uffsicht, de Vorstand stieht vor,
die Aanträsch abgelehnt, orrer ze spät abgebb wor,
Die Mitglieder schweische un sitze fein still.
Und de Koll führt durchs Programm und zählt aus wie’rer will!

Die Summerpaus war viel ze korz, wer sollt do schun kummen, is eh alles schnorz,
Solle doch all giehn, mer peife druff, mi’m Foda steiche mer eh net uff!
Doch... was dann kam konnt siehn sich losse, dodebei ware schon e paar Geschosse.

Torrejon, Riedel un Bunjaku - Nsor, Alushi un de Idrissou,
Hajri un aach Azaouagh, kame noch im Doppelpack.
Un dann zum Schluss noch ääni Mann, un der hieß Alex Baumjohann!
Des sinn schunn paar, so kennt mer määne, die um de Uffstiech spiele kenne.

Mer hott gemäänt der Kuntz kennt hexe, dezu noch ään, zwää Eischengewächse!
Zuck, Zellner, Linsmayer un Co., die Fans am Betze ware froh.
Un ääner muss mer äänzeln nenne, weil den in paar Johr alle kenne!
Der Heintze-Bub spielt e Riese-Saison, ....
selwscht die Bayre und Pilledreher wisse das leider schon!
Es sinn aach paar fort... doch ich will mich net quäle, die all nochemol jetzt uffzezähle.
Alles in allem 17 Mann, e ganzi Mannschaft is do gang!
Mol wirrer e rischidisch großi Schnitt, wenn das emol gut geht.... Isch weeß es nit!

Es ging frieh los, schunn Anfang Auguscht, hätt das werklisch so gemuscht ???
For manche Kicker war’s viel ze frieh, drum gabs erscht mol e Remmie,
Dann zwää mol gewunne, aach im Bokal, hoch die Fahn, un raus mett’em Schal!

Donn kame die Löwe, mir wollte was biete, doch wirrer nur e Unentschiede!
Auswärts klappts besser, is net geloh, der nägschdi Siech bei Dynamo.
Und dann aach dehääm endlich gewunn, geesche die Zebras zur Middachsstunn,
Sunndaachs..... wo normali Leit noch beim Esse sinn,....
orrer grad aus de Kerch kumme, ... wo fiehrt das noch hin?

Es sollt so bleiwe, bis am Enn vum Johr, zeviel Unentschiede, wenn aach net oft velor!
Hertha, Braunschweich, Ingolstadt, Kölle, Paderborn und Jahn,
mit denni zwää vum Anfang... acht mol nor ääni Punkt ingefahrn!

Sieche geesche Cottbus, Duisburch, Sandhausen, Aue,
...dehääm zu wenisch, dut misch net verhaue!
Wer am Enn owwe sein will, der muss die Kohle, vor allem dehääm aussem Feier hole!
Bei de Bayre war dann im Bokal aach Schluss, die Knete ingesackt un e schääni Gruß,

Un aach wann de Betze vorne debei, mer hatt net so das Gefiehl, dass es lääft, allewei.
Die Stürmer renne viel, weil’s halt schään is, awwer all iwwer alles treffe se ze weenisch!
De Betze brauch Schangsi noch un nöcher, un hinne hemmer trotzdem ään, zwää Löcher!

So dass määschdens wanns vorne wie immer net knallt, irschendwann hinne ääner fallt.
Un dann kenne mer uns, is die Ordnung velor,
e Spiel drehe... das kummt in letschder Zeit net so oft vor.

Mit dere Gewissheit gings in de Herbscht, mit Bauchgrimme, ob das das diss Johr was werrd!
Braunschweich eilt devun, un die Hertha is aach kaum ze packe,
dann hinndran noch Cottbus un jetzt Aale im Nacke.

Un als ob das net reiche däät zum Greine, gabs noch paar annri Sache zum Weine.
Die Hauptversammlung stand vor de Dier, ....
nor wann war die Froh? ... Mittwochs middachs um Vier?

Unser Satzung schreiwt vor von wann bis wann, so e Hauptversammlung sein derfe kann,
unn die Fans henn gewollt, dass mieh Leit bei de Sache,
das ganzi Brombores annemi Freidaach ohmend ze mache!

Dass das vorm’e Heimspiel net gieht, war alle wohl klar,
doch als der Termin dann drauße war,...
gabs Mecker, vor allem vun de Allesfahrer viel, ausgerechent am Ohmend vorm Paul-Spiel!

Mer kanns käänem recht mache, das is gewiss, manch ääner macht aach zuviel Geschiss,
Mer wissen all, wie die DFL dut renne, un das mer an dere Spielplanung nix ännere kenne.
Un dann hott sich de Vorstand, aach zum Missfalle, äwe trotzdem aan die Satzung zu halle.

Awwer in dere Versammlung, ich will hiernet unke...
Ging’s joh drum die Satzung ze ännere, .... in einische Punkte!
Un mer kann joh wemmer will, ich finns net zum lache,
so e Bilanz aach e bissje frieher fertisch mache!
Dann hott mer mieh Spielraum im letschdi Quartal,
e guder Termin find sich dann... uff jede Fall!
Thematisch gabs wahrhaft e klääner Genuß, kaum ze fasse, de Betze is wirrer im Plus!
Von dem Iwwerschuss kenne mer jetzt, es is kaum ze glääwe,
denni zwää geschasste Trainer noch e Polo’sche kääfe!

De Rescht reicht fors Porto fier die nägschdi zwää Woche,
hey.... Is nor e Spass! Dut misch net vepoche!
Mer muss es mol saan, damit’s jeder rafft, super vum Vorstand! Habt gut geschafft!

So war die Sitzung ganz ruhisch un määschdens aach friedlich,
de Kuntz am Grinse, de Rombach gemietlich,
de Grünewalt musscht kää komische Stadisdike mache,
es muscht sich aaach niemand iwwer de Beck kaputt lache.

De Kuntz hott nix geesche Fans, die gern mit redde,
aach nix geesche die Abteilung, die die gern hätte,
fier die nei Satzung werrd e Auschuss gegründ, damit am Enn aach alles stimmt.

So gings frieh hääm, un kääner war bees,
viel ware joh aach schunn noh Pauli unnerweeschs,
doch die Reise brachte nix in, es is wahrhaftisch wohr,....
seit de Hauptversammlung hott de Betze nur noch verlor!

Eischentlich wars das schunn, ging doch ganz flott! Wär do net der Palaver, mit dem Boykott!
12:12! Welch Symbolik! Doch um was isses gang?
Kummt der Sinn vum Protescht iwwerhaupt an?

Mol zerick zum zum Grund fier das ganzi Geplärr.
Es gebbt Leit die fahre jed Wocheänn met ihrem Gescherr,
uff die Spiele vun de Mannnschaft und unnerstitzen de Veroi, so is gut, un so solls aach soi.

Uff de anneri Seit steht e Hunnerschaft Grüne, die uffbasse misse, dass uff dere Bühne,
net paar Dolle debei sinn, die aus’sem Kampf um die Sache,
e heilische Kriesch orrer die Fußball-Antifa mache!

Un aach wann ich selwer e Pyro-Fan bin, die Zeit is erum, siehts äwe in!
in de Stadie sinn heit soviel verschiedeni Sorte, es is nimmieh die grossi, gemeinsami Horde!
Mer kann net mit 20 Prozent vun de Leit, alle annere vorschreiwe wie mer sich freit!

Un aach do bin in ääfach net opportun, Pyro hett grad mo gar nix mit Ultra ze dun!
Ultra is im Kopp, net uff de Gass, was for Ferz, es geht um de Fußball, un um de Kommerz!
Es gieht net drum die 80 Prozent zu vereiere, un sich jede Samschdaach selwer ze feiere!

Awwer: Was isch gefährlisch finn for e Stick, is die eklatandi Inmischung vun de Politik!
Die Polizei hott jetzt langsam die Messer gewetzt, bei dene giehts um die Arwetsplätz!
Wenn kää Feschtnahme wäre, und kää Krawall,
breicht mer jo nor die Hälft vun denni Grüne ball,.... Mmmh?

Deshalb henn die aach gar kää Intresse, egal wie mir schenne,
die werklischi Krawallmacher fescht ze nemme!!!
Die Veroi missen gucke, im eischeni Haus, schmeißt endlich die Pharisäer raus!
Bestroft endlich die, die Scheiße baun, die kaputt mache, zündele, kloppe un klaun!

Wann donn noch die „echte Ultras“ härre Zivilcourasch,
un träte de Dumme in de eischeni Reih mol in de Arsch,
dann breicht kää Wendt un kää Friedrich mieh ze blaffe,
dann härre die Bulle nemmlisch nix mieh ze schaffe!!!
Un deshalb gieht mir der ganzi Bohei, kilometerweis an de Sach vorbei!
Der Boykott war in Ordnung, weil erreicht war die Grenz,
un Fußball gieht ääfach net ohne Fans!!!

Doch jetzt muss an de Basis geschafft werre, awwer flott,
deshalb verstiehn ich aach de Boykott vum Boykott,
weil äwe 80 Prozent im Stadion dut Politik net jucke,
die wolle verdammt nommol Fußball gucke!

Wann moje frieh ääner verhaft werrd uffem Klo in de Bahn,
weil er soi Pyro zesamme baut und hott e Kipp debei aan,
springe alle uff die Zäun un mache de Riss, weil joh e Fußballfan kää Verbrecher is!

Wann donn es Gäschdikurve-Kontingent...
abnemmt, komme dausend Mann gerennt!
Ei härre die dausend denni Ääni gestoppt, wäre genauso viel Fans wie immer im Block!

Awwer wann de Betze ins Trainingslager fahrt,
dort for e Test geesche Salzburg steht parat,
orrer wann im Jänner werrd gekickt de Ball, in Ost-Ludwigshafe im Hopp seiner Hall.......

Dann heer ich nix mieh vun „Ultra“ und „mir sinn degeesche“,
weil mer muss sich joh met de Zeit beweesche!
So macht mer sisch selwer de beschdi Knewel,
un die ahnungslosi Politikusse sitze weirer am längeri Hewel.

Drum singt, danzt, macht Choreo in de Kurv, mer sinn in Lautre, net in Wolfsburg beim Turf!
Macht Protest an de Basis, bleibt Ulras im Kopp,
ohne Radau uff de Gass un (leider...) ohne Pyro im Block!

So ihr Lautrer, jetzt isses erum, ...es Gedicht uff jede Fall, un nemmts mer net krumm,
dass es so lang is dissmol wor, es war hall viel los in demm do Johr.
Ihr kennts eich joh indääle iwwer drei Daach, un stickelchesweis lese, ... mit Gemach.

Peift uff Happy Hoppies un uff de Depp, mir mache uffem Betze jetz Näjel mit Kepp,
damit mer alsball net noh Karlsruh, Monnem un anneri Plache,
sonnern noh Frankfurt, Disseldorf un Stuttgart fahre!

Eisch all, aach em Vorstand unnem Uffsichtsrat,
viel Weitsicht und Gelassenheit, es is’se schmali Grat.
Wanner brav wart, versprech ich eich gewiss, dass im letschdi Dierche e Dräämsche is,

Ääns vum Uffstiech, und vun Äänischkeit in de West,
weil sich’s donn viel besser feire ... un ach traure lässt.
Kummt gut iwwer die Daach, gießt e bissje Zinn!
Frohe Woihnachte eich, eire Eltre un Kinn!

Das gesamte Team von „Der Betze brennt“ wünscht allen Freunden und FCK-Fans ein frohes Weihnachtsfest sowie einen guten Rutsch ins neue Jahr! Auch über die Feiertage halten wir Euch natürlich täglich über alle Neuigkeiten rund um den Betzenberg auf dem Laufenden.

Quelle: Der Betze brennt | Autor: Rossobianco