Wann de Winner am kalschde werrd...

Wann de Winner am Kalschde werrd,
un de Pällzer soin Gliehwoi zerrt,
donn is Zoit fer'n Resimee an Hand,
s'werrd Woihnacht im Pälzer Land.

Was hott das Johr for uns gebrung?
Am Aafang hommer noch gesung,
un honn geträämt vum gudi Enn,
vum Uffstiech un - ganz allgemeen -
vun gurer Stimmung im Veroi,
un aach vum Enn der Narretei,
Zwedder wor'mer hinner Määnz,
met Luft noh unne uff die Pänz,
honn frohi Hoffnung met genummen,
doch sollt's am Schluss donn onnersch kummen.

Fünnef Neije honn se kääft,
damit's in de Rickrund noch besser lääft,
doch wollt der Sasic, der General,
die bis uff änni gar net all!
De Stefan hott sich dorschgesetzt,
die Messer wore ball gewetzt,
die Grüppscherbildung wor perfekt,
Wor aach de Rausschmiss schunn ausgeheckt?
Zum Heule word's em Pälzer Volk,
des bracht uns donn um de Erfolg!

Die Männerfreundschaft wor's genau,
zwische Trainer un Vau-Vau,
die uns zeërscht un zwar ganz flott,
es Friehjohr donn verhagelt hott.
De Chef wor met em unzefridde,
daat effdersch zum Gespräch ihn bidde,
hott em g'saat so giehts net weirer,
doch hott der's net kapiert wohl leirer,
so muscht der Held vum Kölle-Spill,
de Abmarsch machen, s'word zevill!

Fascht schad drum, kennt als Fan mer määne,
doch muss mer sich devor net schäme,
weil wer net wääs, wer ihn regiert,
zum Schaffott ball de Henker fiehrt!
Drum danke nochmols an dere Stell,
wo immer er aach kickt die Bäll,
wann immer er aach kummt zum Betze,
mer wollen all net iwwern hetze,
er wor'e Stään im Mosaik,
un ohne ihn... wär'˜s net geglickt!

Doch do denoh do ging erscht los,
die Trainersuche ganz famos,
aangebblich hunnert Kamerade
stande zur Auswahl for den Lade.
Erscht Schuppi, der hott abgewunke,
Mensch Markus, wie bisch du gesunke,
zum Betze sääsch du ääfach Nee,
un giesch denoh zum KSC!
Inziwsche wääsch'd joh wie die schaffe,
nix ausser Chores un Maulaffe.

Aus denni, die donn uffgeschriwwe,
sinn droi, vier, fünnef iwwrisch bliwwe,
Wer kennts donn werre, liewe Kinn,
wer macht for unser Betze Sinn?
Vum KSC de Becker Ede?
Des kennt nix gewwe, alder Schwede!
Vun Sandhofe de Daise' Gerd?
Die Bührer-Sau! Das der's net werrd!!!
Mer hunn kää Geld, awwer'˜e Ehr'˜, die hommer!
Und verschon'˜ uns vor dem Rudi Bommer!

Un donn der daachelange Huddel,
met unserm aldi Labbeduddel!
Es hott joh quasi fescht gestanne,
dass'en aus Vizekuse banne,
doch wollt der nie zum FCK,
des is uns heitzedaach wohl klar!
Mer wor'n dem Bruno viel ze billisch,
drum wor soin Geischt wohl aach net willisch.
Im Summer wuschde mers genau,
der macht jetzt Asche beim HSV!

Donn hott mer aus Verzweiflung, Leit,
noch schnell e Zeitungsent' gestreit,
De Pacult Peter wurd kontaktiert,
un domit die Press in die Irr' gefiehrt,
doch eischentlich blibb nor noch änni,
vun dere Lischt, der langi schänni!
Net de Finke, net de Skibbe,
erscht recht net de Rapolder bidde!
Net de Funkel, net de Lodar,
iwwrisch blibb nor de Franco Foda!

Dere hätt donn zum Enn der Leide,
den Vertrach misse noch unnerschreiwe,
hott zug'saat sicher aan de Stripp,
un ist donn doch in Eestreich blibb!
Weje de Kinner ihrer Schul,... das isch net lache!
Do ging's wohl um ganz annri Sache.
Wer so e Changs krieht, un macht donn Zicke,
will annre aus'em Team naus dricke,
un macht die ganzi Palz perplex...
soll bleiwe, wo de Peffer wächst!

Dumm nor, aldiweil ohweh,
mer hatte gar känni Plan B!
Inzwische war die Säsonn rum,
De Stress hott nidder uns gerung,
trotz Changse bis zum biddri Enne,
konnt mer es Schicksal nimmieh wenne,
honn die droi letschde Spill verlore,
un alli Hoffung is erfrore.
Un uff die Schmach noch owwe druff,
mer bleiwen drin - un Määnz steicht uff.

Kää Mannschaft net und noch kää Trainer,
wer do noch hofft, das is e Träämer,
Un donn kam mit dem Kassesturz,
der neiji Mann, ... de Marco Kurz.
Was hommer denni Kerl verschennt!
Nix druff hott der! - honn vill gemäänt!
Wer issen des? - honn annri g'schrie!
Der Hosebloser schafft das nie!
Der flieht vor Woihnachte noch naus,
am Beschde schunn vor Nickelaus!

So is de Pälzer halt, ihr Leit,
was intressiert misch geschdern heit,
was isch net kenn, das fress isch net!
Doch - hinne is die Ent' meischt fett!
Aach isch honn fett ins Klo gegriffe,
mit meini Prognos'˜ iwwertriwwe,
honn net gedenkt, das dere Mann,
su ebbes wie Taktik druff honn kann!
Un die neije Spiller, misst ihr wisse,
honn misch net grad vum Sitz gerisse!

Doch was muschde mer donn siehn?
Wo kummen mer donn domit hiehn?
Mer stiehn joh gar niemieh so dief,
der Kerle spillt joh offensiv!
Der lisst die Ausse mächtisch brumme,
die Geeschner - aussem Spill genumme -
duun sich im Middelfeld fescht renne,
un vorne drinn duuts ständisch brenne,
kää Kick'n Rush mieh, kää langi Bäll!
Mer spillen Fussball! Un zwar schnell!

Am Aafang hott mer noch gedenkt,
s'wär Dolleglick, die Siech geschenkt.
Doch no'rem dritte, vierte Draijer,
Gab's Aa wie Iwwerraschung-Aijer!
Des wor kää Dussel un kää Glick,
des wor verdient - isch werr verickt!
Un Peter Neururer, der Große,
der vorher sich gesetzt in Pose,
un iwwer uns hott nor geläschdert,
den hommer alsball ingeträschdert!

Mer treffen zwar net all zevill
des Geeschners Door in jedem Spill,
doch hinne stiehn mer fescht geschlosse,
un middedrin gibt's aach kää Posse,
nor nein mol - bis zum letschde Spill -
honn annri g'troffe bei uns es Zill,
nor zwäämol hommer grad verlor,
isch mään joh fascht es wär net wohr,
un jeder Standard is gefährlich!
Isch glääb isch spinne - isch mään's ehrlisch!

Erschder simmer seit vier Woche,
weil annri bei uns halt net loche.
De Nemec trifft, de Jendrisek,
aach Lakic wor die längscht Zoit weg,
Un wanns vorne net klappt, zu unsrem Glick,
hommer joh noch den Amedick!
Aach Rodnei un Ilicevic,
Die treffen wie die Elwedritsch,
Bugera, Schulz, Paljic un Sam,
mer machen's halt met alle Mann!

De letschde Ufftritt kennt er hake,
s'wor kall, s'wor nass, s'wor sch... Schade.
Es hott uns de Rekord versaut,
doch peiff isch druff, un das ganz laut,
Nein Punkte Vorsprung uff de Dridde!
Noch fünnefezwanzisch fehlen - bidde!
Noch siwwe Siech un vier Rämies,
donn kiss dem Kurz isch beidi Fieß,
donn flipp isch aus un sauf misch krumm,
donn is des Elend endlich rum!

Donn kummen widder uff unsern Bersch,
kää hausgemachte Fussballzwersch,
Kää Kowelenzer Punkte-Storno,
Kää Kieh, kää Wutz, kää Paderporno,
Un donn zur Ehr'˜ der Fussball-Kroon
Kää Oschdsee-Chores aus de Zoon!
De Bayre, Schlacker, Geissbeck, Fohle,
wolle mer de A.... vesohle!
Bräme un Hambursch, habt der's vernummen?
Uff die Bääm, die Pälzer kummen!

Jungs, halt dorsch, un macht es wohr!
Uff das erklingt der Deiwelschor,
dass ganz Deitschland wirrer wääs,
Freck, was is die Höll so hääs!
Dass Babbnase und Hauptstadt-Deppe,
die Glut in unsrem Uuwe scheppe,
dass Happy Hoppies und Konsorte,
treffen uff Luzifers Eskorte,
un dass VW's und Aspirin,
wejem Deiwels-Bulldog Koppweh kriehn!

S'gebbt net vill ze meckre weile,
drum wolle mer aach net rum heile,
wann ab un zu was net so klappt,
un machmol änni noh uns schnappt.
Ob Hombursch, Monnem un Saarbricke,
was is vun denni iwwrisch bliwwe?
Aach Freibursch, Määnz un Hoppehause
Kriehn all nochmol e Höllebause,
nix bleiwt vun dem traurische Heiwel,
am Schluss obsiecht der rodi Deiwel!

Änni Wunsch hosch' mer schun gewährt,
Chrischkindsche, hosch mei Gebet erheert,
un e paar Daach noh Nickelaus,
mit Fanfar un Sausebraus,
vum Himmel hoch - honn isch gemäänt,
Do kam er her - isch honn geflennt!
Grau isser wor, doch Hauptsach dehääm,
uff dass sisch der Jäggi dreimol schäm'˜
Die Walz vun de Pallz, mer honn se widder
Hans-Peter, met Dir, briegeln mer alles nidder!

Chrischtkindsche, horsch, nor noch änni Wunsch...
Ob Gliehwoi orrer Kinnerpunsch,
ob Grossi, Mittlere, ganz Klänni,
jeder Pälzer will nor das Änni!
Die Aa zu machen un donn is alles vorbei,
Mer honn kää Woihnacht, sondern de 9. Mai,
S'is verdel nach Fünfe, de Schiri peifft ab,
un Jubel tönt dorsch die ganzi Stadt!
Wann'de das hienkriescht, liewer Genosse,
kansch'˜ die annri Sache beim Weihnachtsmann losse!

Jetz wo de Winner am Kaldsche werrd,
un de Pälzer soin Gliehwoi zerrt -
Ihr Mäd, ihr Buwe, ihr liewe Leit,
isch wünsch eisch e rot-woissi Woihnacht heit!
Fallt net hieh, ruscht gut eninn,
met eire Eltre unn de Kinn!
Im Summer, wanns warm is un de Schoppe schmeckt,
Hotts Christkindsche uns de Disch gedeckt,
Wo? Wisst er's net? Ihr kennt all kumme!
Zum Rodes un zum Martinsbrunne!

Quelle: Der Betze brennt | Autor: Rossobianco

49 Kommentare | Artikel weiter empfehlen | Artikel drucken