Weihnachtsgedicht 2014: Frohe Weihnachte eich all, ihr rodi Deiwel! (Der Betze brennt)

Weihnachtsgedicht 2014
Frohe Weihnachte eich all, ihr rodi Deiwel!
von Rossobianco (Gastautor)

Alle Jahre wieder: Im traditionellen Weihnachtsgedicht von „Der Betze brennt“ blickt Rossobianco auch 2014 auf die allgemeinen Befindlichkeiten rund um den 1. FC Kaiserslautern. Wir wünschen Euch ein frohes Fest und viel Spaß mit unserer Pfälzer Poesie zum Jahresabschluss!

Wann de Winner am kalschde werrd
Un de Pällzer soin Gliehwoi zerrt,
donn is Zeit for’n Resimee an Hand,
s’is Woihnacht im Pälzer Land.

Was henn die Deiwel arg gelitte,
die letzschdi Johre, ich derf bitte!
Immer owwe aangekloppt,
und doch am Enn donn nix geroppt.
Des soll ab dies mol annersch soi,
weil mir woll’n gar net owwe noi!
Drumm hemmer eischni Leit verpflicht,
un noch paar junge Bu zu g’mischt,
wam‘mer doch uffsteihe - ungewollt,
donn werr’mer wenschtens net geschollt!

Es is joh aa, wie soll ich sage,
in dere Liga gut zum ertrage,
do muss mer net um Himmels Wille,
samschdaachs gesche Hoffe spille,
mer konn donn, währ‘nd mer Radio heert,
es Audo butze ungesteert!

Mer muss aa net, jetzt guckt net schepp,
am Freidaach ohmend nuff zum Depp!
Do hockt mer liewer in de Klaus‘,
als in Meenz in de Halbzeitpaus‘!
Un erscht recht net muss mer mit Gemurke,
sunndaachs noch noh Frankfurt gurke,
moins in die Kerch, Mittachesse bei de Mudder,
un dann uff de Sportplatz, alles in Butter!

Die zwädd Liecha, die is doch schään,
s’is net so voll do, un aa bequääm,
donn gebt‘s aa net so vill Rabatz,
un die Ultras henn hinnerm Door mieh Platz!
Die kennen donn statt Handgemenke,
stunnelang ihr Fahne schwenke,
und Singe bis die Lunge kracht,
von moijens Öllef bis ohmends Acht.

Animateure schrein dir in die Ohre,
ballen die Fäuste zur Betze-Folklore
Lateinische Rhytme und Schongsons,
ganz egal ob de Betze hett grad e Schongs!
Ob mer vorne orrer hinne sinn,
weil mer gucken gar net hinn!
Ganz egal, denn jeder weiß schon:
„You will never, never ever, walk alone!“
Un wenn die Leit sinn nimmer froh,
machen mer halt e schänni Choreo!

Nur fers Protokoll: Net dass ihr denkt,
ich hätt was gesche Ultras! Quatsch! Geschenkt!
Ich henn nur ebbes gesche Gepose und Manipulation,
und gesche so manche verbale Masturbation!
Un wer vor mir ewisch die Fahn schwenkt, der muss sich ducke,
weil ich bin nämmlisch do zum Fußball gucke!

Ich forder deshalb für die Wescht,
e zwäddes Mikro mit Podescht!
Zwische Siwwener un Achder sollt’s gelinge,
donn kennen do die Oldschools singe!
So hemmer endlich, wunderbar,
die K-Town Singin‘ Area!
Und RTL macht mit uns Kohle,
duut den Bohlen uff de Betze hole,
Bumm-Bumm-Klatsch mit ganz viel Hänn,
Deutschland-sucht-den-Superfan.

So isses gut, weil echt ohne Witz,
des in de erschdi Liecha gar net meeschlisch is!
Bei denni Horde die dort kummen,
wird jedes Teil dir weg genummen,
Abertausende von Schläächer,
Hooligans un Schwerverbräächer,
werre donn zum Volks-Missfalle,
unser schennes Städtche iwwerfalle!
Des kummt so, Leit! Ich will eich net betrüge!
Die Polizei däät niemols lüge!

Mir bräuchten geschen Paderborn,
fünnef Hunnerschafte am Kreisel vorn,
und geschen Augsburg missten zehn,
schunn minschdens mol am Bahnhof stehn.
Fuffzehn sperren ganz geduckt,
gesche Ingolstadt es Viadukt!
Leverkuse und Wolfsbursch, oh mein Gott,
20 mol 100 Bulle, die mer gar net hott!

Und was wird erscht, wenn Hoppelheim kummt?
25 Hunnertschafte, ... voll vermummt?
Die Spille geschen Bayern, Schalke, Gladbach und Co.
Würde in die Schweiz verleet, is net geloh,
und Frankfurt, Määnz und Kölle heer ich grad,
werre ääfach vormittachs abgesaat!
Weil klar is, könnt ihr das net spiere???
Mir sinn alles wilde Tiere!!!!

Drum is besser mir bleiben unne!
Donn kommen erschtens net vill Kunne,
zwäädens net vill Polizischde,
die mer all bezahlen misste.
Driddens kann die Ultra-Sippe,
weiter singen, schwenke, hippe,
und viertens, und das is es bescht,
krieh mir lauter nette Gäscht!
Dortmund, Hambursch orrer Brääme,
Wüsst net wenn ich do liewer nähme?

Donn kicken mir zu früher Stund,
am Sunndaach mittach in Dortmund,
und gucken samsdaachs in aller Ruh,
uff Sky Stuttgart geschen Karlsruh!
Do druff e Weißherbscht, ganz noh meim Wille!
Loss doch die Bayre gesche Leipzisch spille,
un für den Pay-per-View-Depp, der Spass dran hat,
gibt’s Wolfsbursch geschen Ingolstadt!

Was noch ze saan war in demm Johr...
Mmmh, kam doch noch ebbes annres vor?
Ach jo, jetzt fallts mer in, genau!
Mer hatten widder JHV!
Awwer eischentlisch, mol ungeriehrt,
do is joh diss Johr nix bassiert!

Die ääne hunn gebabbelt und die annere hunn geschennt,
der ääne hett den annere e Liehner genennt,
Der mit Brill hott sich verrechent, der mittem Bauch hott posiert,
der vum Saarland hett mit de Zeidung e Kriesch gefiehrt,
der Dokter aus Määnz hett sich denewe benumm,
der Majores aus Berlin is mit Geld in de Uffsichtsrat kumm,
der aus Bexbach hett gemotzt, der aus Kölle hett verlor,
der, wo am meischde hetzt, is Ehremitglied wor!

Un am Enn kam ein wilder Hass-Tiraden-Ritt,
vom Prinz Valium aus de Fassenachtsbütt!
Mer määnt grad, es is net geloh,
der aus de Schweiz wär aa noch do!
Eigentlich also nix bassiert, alles wie’s immer war.
Weiter im Gleichschritt, Helau FCK!

Im Friehjohr solls bassiere, so isses geplant
Ihr Leit, mir Böses dabei schwant!
De Betze, heer, wie kennt des soi,
nur noch Firma? Känn Veroi?
Ihr kennt denke wier‘er wollt, egal welche Scharsche,
awwe losst eich bitte net verarsche!

Es geht dene nit um de Betze, do is känner de Held!
Es geht nur noch ums liewe Geld!
Alles Quatsch un Bumbes, was die verzähle!
Alles Steuertricks, wo die uns mit quäle!
De Fröhnerhof werd zerickkaaft, mer muschde lang warte,
Ball werd er widder verkloppt, vun eierm Gesparte!
Ihr raffts net, und die lachen sich kaputt,
weil die fallen met ihr‘m Sparbuch net uff die Schnutt!

Ausgliedern ja, un Gesellschafte gründe!
Awwer doch bitte net dorsch die Bruscht von hinte!
Wer hockt dann später ganz parat...
im selbsch gewählte Uffsichtsrat?
Und ihr wählt die, die eich abschaffe?
Do bleibt mer nur noch änn Wort! A...
Wann de Betze kää Veroi mer is,
donn tret isch aus, des is gewiss!
Donn solln sich die Heuschrecke ihre Kohle,
woannersch als aus meim Geldsack hole!

So... kurz nomol sportlich, es is jo kaum ze fasse,
mir henn des Johr mit me Siech verlasse!!!
Das hebt die Stimmung unnerm Bäämche,
es weckt vielleicht aa manches Träämche...
Doch Leit, denkt noh, ich will net unke,
mir warn vill ze selte siegestrunke,
henn vill ze vill gemacht nur Posse,
un meischdens Punkte lieche g’losse.

Der Kosta spillt mit Hacke Spitz,
und achtet nur uff Ballbesitz.
Des sieht gut aus, gefällt ganz schnell,
bringt nur känni Punkt in de Tabell!
Simmer ehrlich... unner uns Alte:
Mir dun des Spill ze vill verwalte,
Mir sinn zwar gierisch, awwer net abgezockt,
und henns hinne leider manchmol verbockt.

Mir henn Schangse für zwää, un kriehn känni rinn,
awwer beim erschdi Ogriff vum Geschner, is änner drin!
Ich scheiß uff des Zwäddliecha-Tiki-Taka!
Ich will Furche siehn do uffem Acker!
Blut un Schwääß haut mich vum Stuhl!
Nix Barcelona! Liverpool!!!

Des reicht net für vorne, unn net für de Zwädde,
aach wammer den so gern endlich hädde...
unn uf de Dridde henn isch kää Bock ... des kennt er glaawe,
am Enn gesche de VfB ... so werds laafe!
Was bleibt also hänge? Was is? Wer simmer?
Ich muss ehrlisch sage, isch henn känn Schimmer!
Nur noch e middelprächtische Zwäddligischt?
Orrer e Traditonsveroi, den mer nie vergisst?
Uff de Jacht noh de erscht Liecha, weil mer dort hin g’heere?
Orrer uffem absteichende Ast, nem völlisch quere?

Demm Schdeffon soi aldi Arwet, die macht jetzt de Maggus,
un der macht des subber, do red ich känn Stuss!
De Konrad is hinnedran soin beschde Mann!
Do muss mer alles for mache, dass mer den halle kann!
Und genau so wischdisch is de Neie, de Boris Notzon,
Gut uffgestellt simmer, bin ich iwwerzeischt devon!
Denn wanns nit funktioniert, und des wär vun weitem ze riche,
donn schläächt de Gerry ämmol heftisch dezwische!

Deshalb geht’s weider, de Kosta is jo net allään!
Un unser Betze eis jo net aus Sand, sonnern aus Stään!
Egal wo’s aa hin fiehrt, ich saa eich bloos,
uff jede Fall nie mehr in orongsche Trickoos!!!
Und änns is gewiss, egal welche Show,
so lang mir e Veroi bleiwen, bin ich aa do!

Drum alla fort, ihr Leit, ich heer uff ze maje,
wollt eich nur mol mei Sichtweis vum Betze zeihe.
Mir sinn wie e Familie, mir hallen z‘samme,
ach wemmer uns net immer die Hänn hinn lange.

Mol kem‘mer uns gut honn, un mol net so leide,
mol sim‘mer veheirat, mol losse mer uns scheide,
mol sim‘mer ganz sieß und manchmol sau scharf,
mol mache mer Wallung und mol sim‘mer brav.
Mir sinn de Betze, un de Betze - das sinn mir!
Also basst uff, wer eich belieht, un setzt’en vor die Dier!

Losst eich beschenke, vor allem mit Liebe,
Gesundheit und Glick und geschlechtliche Triebe!
Denn änns bleibt wischdisch grad in schlechtere Zeide,
muss mer sich für die Zunkunft vorbereide,
und unnerm Bäämsche, mi’m Herrgott seim Lache,
e Haufe klänni Deiwelcher mache!

Kommt gut riwwer, und geht schään in die Kerch!
Mir siehn uns im Jänner in Elversbersch!
Weil no Monnem in die Hall, die krieht ihr mich net!
Do bleibt de Flimmerkaschde aus, un ich bleib im Bett!
Machen’s gut, Horridio, Servus un Byebye,
Winkewinke, Allahopp, ohne Weib un Geschrei,
Au Revoir, tschüssikowski, vom Elsass bis zur Eifel,
frohe Weihnachte eich all, ihr rodi Deiwel!


Das gesamte Team von „Der Betze brennt“ schließt sich an: Wir wünschen allen Freunden und FCK-Fans ein frohes Weihnachtsfest! Auch über die Feiertage halten wir Euch natürlich täglich über alle Neuigkeiten rund um den 1. FC Kaiserslautern auf dem Laufenden.

Quelle: Der Betze brennt

Jetzt wird sogar schon im Weihnachtsgedicht alles was passiert schlecht geredet...Wie soll ne Mannschaft die vorwiegend aus Jugendlichen besteht abgezockt sein? Haben Eigengewächse wie Orban und Heintz nich auch das Recht hinten mal was zu verbocken? Iwie widersprichst du dir in dem Gedicht selbst...


Was du allerdings über die ach so tolle Bundesliga schreibst geb ich dir vollkommen Recht. In diesem Sinne danke für die Zeilen und frohe Weihnachten

Es ist mal wieder, grandios und sehr unterhaltsam, Applaus dafür , von mir auch frohe Weihnachten an alle

An alle:



und

Wohlan, junge Teufel!

Losst eich beschenke, vor allem mit Liebe,
Gesundheit und Glick und geschlechtliche Triebe!
Denn änns bleibt wischdisch grad in schlechtere Zeide,
muss mer sich für die Zunkunft vorbereide,
und unnerm Bäämsche, mi’m Herrgott seim Lache,
e Haufe klänni Deiwelcher mache!

Keine Ausreden mehr!

@Kuhardter
Vielleicht solltest du dich einmal ein paar Minuten ruhig in einen Sessel setzen, drei mal gaaanz langsam "Heuwaegelchen" sagen - und dann das Weihnachtsgedicht in
Ruhe noch einmal lesen.

@Rosso
Ich hab schunn druff gewaat, s'is awwer wie immer.Allererschtie Sahne.

Den Wünschen schliße ich mich vollumfänglich an.
Dem Verfasser ein großes Lob für die Krativität mit Witz und einer Portion Ernst
Auf einen guten Start in das neue Jahr .

Frohe Weihnachten und alles Gute im nächsten Jahr!

Wie jedes Jahr das Highlight zu Weihnachten. Vielen Dank! Und über diese Strophe

"Mir henn Schangse für zwää, un kriehn känni rinn,
awwer beim erschdi Ogriff vum Geschner, is änner drin!
Ich scheiß uff des Zwäddliecha-Tiki-Taka!
Ich will Furche siehn do uffem Acker!
Blut un Schwääß haut mich vum Stuhl!
Nix Barcelona! Liverpool!!!"

habe ich Tränen gelacht.

Frohe Restweihnachten an alle!

Einfach klasse.
Rosso hat ne schöne Mischung fer des Gedichdel gfunne. Is alles drin, mol witzig, mol ä bissl schärfer, mol zum Noochdenke - rundum gelunge.
Mir g'fallts prima.

Die zwädd Liecha, die is doch schään,
s’is net so voll do, un aa bequääm,
donn gebt‘s aa net so vill Rabatz,
un die Ultras henn hinnerm Door mieh Platz!
Die kennen donn statt Handgemenke,
stunnelang ihr Fahne schwenke,
und Singe bis die Lunge kracht,
von moijens Öllef bis ohmends Acht.

sehr genau analysiert - genial!!