E klee Gedischt for Weihnachde

Wannde Winner am kaldschde werrd,
unn de Pällzer soin Gliehwoi zerrt,
donn is Zoit forn Resimee anhand,
ball is Weihnacht im Pällzerland.

S'hott paar gebbe, die hann gemeen,
die Tradition wär net so scheen,
ma breischt nor Kappe, Schale, Mitze,
unn fuffzehdausend Schalesitze,
unn Klauns, Trumpede, Trummele,
donn nor noch bissje dummele,
unn huppe, bess die Schmink velääft...
des honnen manche abgekääft.

Doch jetzert korz vor Niggelaus,
do ward es dunkel, Lichter aus,
kee Singe, Kreische, Uffgebääm,
kee Huppe, Waggle, nix gewään,
de Chores aus de grossi Stadt,
war so gross met Hut wie platt,
unn wammer se net hätt gesieh,
allsemol im Pay-TV,
donn hätt ich g'saat ganz schadefroh,
„Meenzer - nee du - keener do!“

E Stadion bauen wolle se,
for Dreissischdausend Bollesje,
Unn wann de Babba Beck nix gebbt,
donn gieht's no Hesse, do gucksch' schepp,
Mit Taunusstein zesammen baue,
wie kommer sich su ebbes traue,
unn donn noch uff de annri Seit?
Herrgott, was mich der Jander freit!
E Schniss wie'n Gaul unn nix dehinner,
nor Humba-Humba, alles Kinner,
Dausend Schalker, die sinn lauder,
so e Brilljes, beim Klabauder!

Mer schwarte net, wer weeß was kimmt,
ob Wolle unser Buwe trimmt,
uff dass mer neggscht Johr widder owwe,
ei dodruff kenn' mer heit nor hoffe!
Doch enns is klar, so wie die Brieh,
die Humbanaute schaffens nie!
Machtüwwernahme aangekünnischt,
bei der Tabell, do klingt das zynnisch,
Wann mers net packen, ihr Mainzel-Zwersch,
siehn mer uns ball am Betzebersch!
Doch hält der Wolf die Buwe fit,
fahrt ihr noh Kowelenz, unn mer nit!

Sellemols do war'ns Saarbricker,
Neikerjer unn „die-Klub-Kicker“,
speerer Monnem unn Karlsruh,
die hann uns all net weh geduu.
Was wolle donn so'n paar Rhoihesse,
sich wei met unsern Deiweln messe?
In hunnerd Johr noch werrd's so soi,
stehn mieh Karosse dort am Rhoi,
met FCK-Uffbabber druff,
do leeft die Katz' kee Bääm enuff!

Der Kloppo kann grad weider klaache,
unn soin Helau zu Grabe traache,
Die ennzisch Religion im Land,
kummt aus de Pallz, s'is allerhand,
wie sellemols de Obba saat,
wo die Homboier grad gut in Fahrt,
verfallend net jetzt in de Wahn,
was kummt vunn allaan, gieht aach vunn allaan...

All die Null-Fünfer, des sinn linke,
no Baire unn Borusse stinke,
hann in de Kneip gehockt vor Johre,
unn uff die Grossveroi geschwore,
jetzt traan se rot unn schrein Helau,...
wann isch mich emmol suwas trau,
schlaant mer uffs Maul unn macht mich naggisch,
unn schmeisst mich aus de Wescht raus,... zaggisch.

Wer's no net wees dem saan isch's fort,
mer Pällzer sinn en annri Sort,
sinn kenni wo die Flucht ergreiwe,
unn sich neggscht Johr wo annersch treiwe.
Die enni Stadt unn mei Veroi,
des is so, unn des werrd so soi,
do kenn' die „Fleeschworscht-Fresser“ schaudre,
LANDESHAUPTSTADT - KAISERSLAUTRE !

Drumm leit a dissjohr unnerm Bääm,
kee Meenzer Kroms, des isch mich schäm',
19ter Mai - do steit ihr ab,
donn schwenk ICH laut mei Narrekapp!
Enni Daach speerer, mei Ehrewort druff,
steit de Betze widder uff.
Wer will donn eiern Kroms noch hunn,
unner der rheinland-pfälzisch Sunn?

Es Chrischtkindsche hotts glei gewisst,
unn hott der Krembel fortgeschmiss'.

Quelle: Der Betze brennt | Autor: Rossobianco

42 Kommentare | Artikel weiter empfehlen | Artikel drucken