E klenn Gedicht for Weihnachde

Das Team von "Der Betze brennt" wünscht allen FCK-Fans ein frohes Weihnachtsfest und einen guten Rutsch ins Jahr 2008!

Rechtzeitig zu den Feiertagen präsentieren wir Euch Rossobiancos traditionelles Weihnachtsgedicht, in dem es diesmal um die Spiele und Spielchen rund um den Betzenberg geht.

Wannde Winner am kaldschde werrd
Un de Pällzer soin Gliehwoi zerrt
Donn is Zoit forn Resimee an Hand
S’is Weihnachde im Pällzer Land

Wannde Hahn kräht uffem Mist
Ännert sich’s Wetter, oder‘s bleibt wie’s is
In Lautre ännert sich’s grad zimmlich fix,
nor vum schenni Wetter sieh mer nix.

Die letzschde Johre hommer gepetzt
Üwwer die annri Dolle gehetzt
Üwwer Humbanaute gemeckert
Net geklotzt un oft gekleckert

Doch sellemols war’s net wie heijer
Der Spott für annri wär ze deijer
En jedi kehr vor seine Dier
Do hotter Dreck genuch defier.

Üwwer de Sport brauche mer gar net ze redde,
do hilft uns beschdefalls noch Beede,
Wer emol guckt uff die Tabell
Versteht mei Worte zimmlich schnell

De Trainer kann do nix defor ?????
Krieht weesche uns nor graue Hoor
Hott Taktik un aa Spillsystemm
Nor spille unser Jungs net schenn!

Die Abwehr steht, is aa kenn Wunner
Bereit de Rescht uns doch nor Kummer.
Die hinne honn soviel ze tun
Die schaffen ohne auszeruhn.

Weil vorne unser Spitzestürmer
Sinn grad so schnell wie Rejewürmer,
Siehn die de Balle erschtmol komme,
do isser’n aa schunn fort genomme.

E Middelfeld, das brauch mer net
Es gieht aa ohne – was gewett?
Mit lange Schlääch von hint‘ no fier,
Vollspann druff und Gott mit dir!
Sie raffen langsam was geback is,
sie hallen druff un aa mit Schmackes,
Sie renne, beiße, kratze, trete,
das war jo endlich aa von Neede.

Nor am Enn stiehn schwarz uff weiß,
15 Punkte – wassen Scheiß!
Die Quetsch muss noi, ei wassen Chores,
alles annri bleibt Kokolores!

Newerm Platz, ich finn kee Worte,
was issen das fier raulisch Sorte,
die kloppe sich jo unnernanner,
Lug und Betrug, es is de Hammer.

Vom Himmel runner grien un bloo
Kriehsch du ins Gesicht geloh,
Vornerum grinse, doch hinnerm Ricke
Duun’se der de Hals abdricke.

Es Geld is all, wo isses dann,
Wo hosch‘s dann hiehne, Schweizermann?
Du saatsch, mer wäre jetzt saniert,
hosch an de Nas uns rumgefiert!

Doin Erbe is e Zahlekünschtler,
der molt die Zukunft schon ganz finschter,
Un demm soin Zwedde sitzt nor do,
und grinst wie Hans vorm Dameklo!

De Uffsichtsrat soll Uffsicht fiere,
un aa berate, … kann‘s net spiere!
Zwar ist de greeschde Kaschper weg,
doch iwwrich bleibe annri Böck.

Der enni weeß net was de anner…
De meischte geht aa schunn die Klammer,
wann enner auspackt uffem Amt,
sinn ruckzuck alle gar belangt?

Die Neie kennen nix defor,
doch singen se schunn met im Chor,
was honn die drei uns dann ze biete,
orrer sinn das vielleicht genauso Niete?

De Messias simmer aa schunn wedder los,
Die Bux ze klenn, es Maul ze groß.
Es saat, sie gewwem jo kee Kohle,
ei, Toppi, woher willsch se hole?

Wannde efftersch in Press,
hättsch gehalle mol die Fress,
un wärsch geblebb e bissi fair
dann gäbs vielleicht e bissi mehr.

Helfe wollschde uns doch ehrlich,
warsch no 6 Woche unentbehrlich,
dann sollschde Rekdal abrasiere
un uns mit nem annere kompromitiere!

Hosch uff doin Kompetenz bestanne,
un mach’sch dich angepisst von danne.
Bei allem Reschpekt in jedem Fall,
Toppi, das war en übler Knall!

Jetzert is kenni wohl mehr do,
der was vom Fussball vesteht, ach jo…
de Trainer machts jetz ganz allenns,
der hott se jo im Griff, die Pänz!?

Der krieht aa sicher mit soim Name
Bei unserm finanzielle Rahme,
un unsrer Tradition ohne Ende,
lauter Weltklassekicker…. Kurz vor de Rente!

Weil mer die Pfründe schütze wollt,
hott mer die Kritiker geschollt.
Wo sinn dann die Sponsore weile,
die uns versproch wor sinn in Eile,

40 Prozent honn „Nee“ gesaat,
ach hätte sich paar mehr gewaat!
Dann hätts gereicht, zum Schulterschluss,
nor so rum, bleibts beim Stuss!

Am beschde bleimer all dehääm,
aus Fruscht, aus Hass, weil ich mich schäm,
was ihr do macht mit dem Veroi,
gieht uff kee Kuhhaut – Sauerei!

Wollt mit de Große brunze giehn,
un kennt no net mol uffrecht stiehn,
denn dreht mer eich de Ricke zu,
hott mer e Messerr drin im Nu!

Wär Meenzer ich, was dät ich lache,
was honn mir fescht gefahr de Karre,
ball fahre mer no Trier kicke,
un werrn kenn Meenzer je mieh blicke.

Ihr schwätzt vun Solidarität,
und von „Familie“ wo’s nor geht,
doch Hilfe wollt ihr net von alle,
nor von dene die eich gut gefalle.

Ihr boxt mit Worte wie klenni Kinner,
s’wird vun Daach ze Daach noch schlimmer
Seid mer ruhisch bees, un kreuzigt mich…
IHR macht Lautre LÄCHERLICH!

Besinnlich sollt die Weihnacht soi,
dennoh kimmt erscht die Narretei,
doch in Lautre, mir werrd bang,
hott die Fassenacht schunn angefang.

Horsch…. Es kloppt draus am Fenschterrahme,
s‘ Christkindsche kimmt mit wehende Fahne…
was ich mer winsch, hotts mich gefroot,
ich saat, Christkindsche, ich bin in Not.

Ich winsch mer Punkte, so um die dreißisch,
ich weeß, ich war jo gar net fleißisch.
Ich winsch mer Geld, so ganz am Rand,
für mei verwenndi Rasselband.

Ich winsch mer e Stürmer von Weltformat,
e Miro Klose im Quadrat,
Ich winsch mer wie de Wuttke en 10er,
un wie de Feldkamp noch en Trainer.

Ich winsch mer Schiris met Teufelsblut,
vielleicht werrd dann noch alles gut.
Doch am meischde, ich gebbs zu,
winsch ich mer…. Vier Woche Ruh!

Es Chrichkindsche saat, mein liewer Bu,
das sinn ze vill Winsch, un das weesch du!
Ich saat, ei Chrischtkindsche bass emol uff,
ich halle uff enni de Finger jetzt druff.

Was es war… veroot ich net!
Ich giehn met meinem Wunsch ins Bett,
Ich trääm vunn deitsche Meschderschafte,
vunn Bogale un vunn Eiropa-Schlachte.

Un ihr macht aa die Äuglein zu,
un träämt von all dem aa in Ruh,
frohe Weihnachde ihr Leit,
ob in de Pallz orrer woannersch heit.

Hallend dorsch, sowas kimmt vor,
wie’s ausgeht, ei mer werrn‘s gewohr!
Ein gesegneter Gruß zur spädi Stunn…
… Ach ja…. In Gladbach - werrd gewunn!!!

Frohe Feiertage ohne FCK-Stress
Wünschen

Rossobianco und das gesamte Team von "Der Betze brennt"

Quelle: Der Betze brennt | Autor: Rossobianco