S'werrd Woihnacht im Pälzer Land

Stellt eich vor, ich henn's Chrischdkinndsche gesiehn...
Es fiel dorsch de Pällzer Wald unn konnt nimieh stiehn.
All iwwerall uff de Tannespitze,
sah es goldene Lichtlein blitze...

Denn wannde Winner am kaldschde werrd
Un de Pällzer soin Gliehwoi zerrt
Donn is Zoit forn Resimee an Hand
S'is Weihnachde im Pällzer Land.

Es war sunndaachs im schenni Mai,
e bissje späder wie Uhre drei,
do hott de Helmes s' uffem Fuss,
der Bundesliga letschder Gruß.
Es hätt uns kenne s'Läwe koschte,
doch hinnerm Sippel war de Poschte,
Als hätt eener owwe druff gewart,
de Betze spillt uff die leschdi Kart.

Im Gejezuuch - mer dorfts net hoffe,
hott dann de Simpson besser getroffe,
un owwe - als wärs e Himmelzeiche,
hott de aldi Fritz aangefang ze kreische.
Die Buddigg is ball explodiert,
die Mensche all ze Träne geriehrt,
noch zwee vum Ziemer, dann wars gewiss,
dass am Betze aach weiter Fußball is.

Als im leschdi Winter de Toppi kumm is,
hemmer gemeent, dass de Aijer rumm is,
doch mit Bauckhage, Fuchs und dere Konsorte,
war de Unnergang quasi des Deiwels Eskorte.
Absteije losse wolde die uns,
Vum kompledde Neianfang honns gebrunst,
mit Oschdermanns Millione-Spass
ganz unne in de driddi Klass.

Doch de Fritz hatts spitz krieht, Leit,
hott gesaat, s'is aan de Zeit,
rischdische Kerl zerick ze hole,
um denni de Arsch mol ze vesohle.
Zeerscht kam Milan, de General,
die Vorhut - sozesaan - am Ball,
werkt in Staduur unn aach im Ton,
e bissje wie Napoleon.

Dann kam de Stefan noch reduur,
s'war e Ballangs-Akt uff de Schnur,
die zwee henn dann, wer hätt's gedacht,
de Deiwel widder flott gemacht.
Aldiweil Oschdermänner un schlaui Fix,
die helfe unserm Betze nix,
Hartmut, loss die Knete sticke,
vebroot se liewer in Saarbricke!

Wer hotts gedenkt am Enn vum März,
gehalle hemmer's for'e Scherz,
dass aan besaachdem Sunndaach noch,
de Deiwel kleddert aussem Loch?
Dank Fritz, Stefan, Milan un aach ... Dieter,
... das muss merr zugenn, liewe Brieder,
Is dem Deiwel es gelunge,
er issem Herrgott vun de Schipp gesprunge.

Drum bleibts debbei, ich saan's bequäm,
de Fußball, Leit - der bleibt Dehääm,
Zwischem blaui Rhoi unn finschdri Tanne,
zwische de Preiße unn de Allemanne.
Dehääm - im Fritz soine guud Stubb,
dehääm - for jedi Lautrer Bub,
dehääm - so wie's e Deiwel liebt,
Dehääm - ... so lang's in Deutschland Fußball gibt!

Die neiji Trupp alles halwi Pänz,
muscht am erschdi Spill no Määnz,
Die harre drei un mer noch null,
was donn kumm is, haut mich vum Stuhl.
De Deiwels-Ehrgeiz ausgepackt,
unn los ging's, Knippel aussem Sack!
Am Enn Räämie - noch drei ze drei,
was fore Startschuß, heidenei!

Seitdemm is klar, do simmer widder,
jetzt henn s'es nomol, es Gezidder,
ob auswärts odder uffem Betze,
de Deiwel duut die Meute hetze.
So mancher dacht, e Eintagsfliesch,
die gewinnen doch kenn Kriesch,
doch dann hemmer die Genosse
allesamt vum Bersch geschosse.

Aach auswärts is wie sellemols,
Moderner Fußball? De Deiwel hol's!
Lange Bäll und breite Äärsch,
korze Fuffzeh mit de Zwersch.
Schenni Fußball kammer kääfe,
Herzblut nit, so isses ääwe,
Rusdikal is aach modern,
Hoch de Kopp und zeiht die Sterrn.

Mer kenne schenn, awwa aach hart,
an Kondition werrd net gespart,
Beim Deiwel füllt sich noch die Lung,
do hängt bei Annri lang die Zung.
Mit Hacke, Spitze und Singe im Chor,
is noch kenner Meeschder wor,
Mer muss aach renne, grätsche, wühle,
unn minschdens äämol besser ziele.

Drum uff die Fahn un die aldi Lieder:
Mer „briegeln“ widder alles nieder!
Die Geeschner sinn widder perplex,
wie hääßt's so schenn im aldi Text:
„unn leih'n mer mol vier null zerick,
donn brecht uns des lang nets Genick,
mer henn schunn manches Mätsch gewunn,
in de letschdi Verdelstunn!“

Als neggschdes Määnz unn dann de Glubb,
un gleich denoh, ich werr betuppt,
die Greuther und die Pänz vum Kiez,
Ihr wissent joh, wer's hott, der kriehts!
Wammer die Sach iwwerstehe,
dann kenndi mer noh owwe gehe,
dann simmer reif for hehre Weihe,
de Depp würd Gift unn Galle speie!

Was juckt uns Määnz, es is wie immer,
Lautre bleibt Lautre, und Spinner sinn Spinner!
Was juckt uns Rangnick odder Hopp,
die dengeln selwer sich de Schlopp.
Was juckt uns Kow'lenz und Karlruh,
die nerwe mich als immerzu,
Was juckt uns Wissbaade, ihr Leit,
des leiht doch uff de falschi Seit!

Mer bleiwe mer, des is Gewiss,
drum mache die aach so'n Geschiss,
Es Lääwe is e Fußballspill,
unn wer's net druff hott, schwätzt halt vill!

Stellt eich vor, ich henn es Chrischdkinndsche gesiehn...
Es fiel dorsch de Pällzer Wald unn konnt nimieh stiehn...
All iwwerall uff de Tannespitze,
sah es goldene Lichtlein blitze.

Chrischkindsche saat ich, woher duusch du wetze,
Es lallt mich zu: „Ich kumm vum Betze!“
Ich sah die Deiwel geje Breisgauer Engel,
die henn gewunn, die böse Bengel!“
Uff Geschenke braucht der net ze hoffe,
s'hott sei Geld beim Schappert versoffe!
Drum wünsch ich euch, ihr Bu unn Määd,
Frohe Weihnachde, unn macht net so spääd!

Alla fort!
Rossobianco

Quelle: Der Betze brennt | Autor: Rossobianco

53 Kommentare | Artikel weiter empfehlen | Artikel drucken